Este sábado, o escenario do Teatro Colón acollerá un espectáculo único, producido especificamente para este espazo, e que so se vai poder ver nesta ocasión, enmarcado no ciclo ‘Músicas Posíbeis’ que promove a área de cultura da Deputación da Coruña.
Baixo a dirección artística e creativa do músico Pablo Novoa e o escritor Diego Giráldez, e conducidos no escenario pola xornalista Susana Pedreira, as escritoras e escritores Berta Dávila, Silvia Penas, Samuel Merino, Lucía Aldao, Carlos Meixide, Samuel Solleiro e a cantante Wöyza sorprenderán ao público saíndo das súas disciplinas para cantar, interpretar, recitar e conversar entre si e sobre o feito creativo.
“Poderemos ver a artistas cambiando os teclados de escribir polos do piano: escritores interpretando música, e músicos creando literatura”, sinalou a deputada de cultura, Natividade González. “Ese é o late motiv deste proxecto: poder descubrir os talentos máis descoñecidos das persoas ás que admiramos nunha sorte de xolda e celebración de encontros improbables e pouco frecuentes”.
A deputada engadiu que “a cultura é transversal, e as diferentes disciplinas son a linguaxe, e este sábado imos poder velo perfectamente, ademais de pasalo moi ben e sorprendernos”.
